ALBÛM-HEVPEYVIN                                                                   Koma Dîcle albûma klasîkên kurdî derxist

Koma Dîcle di sala 2006’an de bi albûma xwe ya ewil ‘Dîcle’ derketin pêş hezkiriyên xwe. Piraniya stranên albûmê gelêrî ne û ji aliyê hezkiriyên wê tê ecibandin. Ji ber ku çar endamên komê jî ji herêma Dîcleyê ne, navê komê bûye Koma Dîcle. Me li ser albûma Koma Dîcle, tarzê we yên muzîkê û xebatên wan ên pêşerojê hevpeyvînek çêkir.


Hûn dikarin hinekî behsa xwe bikin? Koma Dîcle kengî ava bû?

Me (Semîh, Eskerî û Hecî) Koma Dîcle di sala 1998’an de ava kir. Piştî ku Koma Dîcle ava bû me di gelek şahiyan de cih girt. Hevalê me Hecî piştî derketina albûmê ji ber hin probleman ji komê veqetiya. Bêrîvan di albûmê de vokal (solo) kir. Ku wê bi dengê xwe yê xweş û bişewat hêz da xebata me.

We çima navê Koma Dîcle li xwe danî? Taybetmendiyeke vî navî heye?

Me pêşî navê Grûp Dîcle li xwe danîbû, lê belê bi piştre me di nav xwe de biryar girt û navê xwe guherand, kir Koma Dîcle. Sedema guherandina Grûp Dîcle ev bû: Em hemû ji herêma Dîcleyê bûn û çemê dîjleyê jî bo me bûbû çavkaniya îlhamê.

Tarza we çi ye?

Tarza me muzîka klasîk a kurdî ye lê belê em carina tarzên wek pop û rockê di nav tarza xwe de bikartînin û ji vê jî sentezekê diafirînin. Lê dîsa jî em ji tarza xwe razî ne û em ê her li ser vê bingehê berdewam bikin. Ji bo me ya girîng orjînalîteya muzîka kurdî ye.


Dema we dest bi muzîkê kir hûn di bin tesîra kîjan kom an hunermendan de mabûn?

Semih: Ez cara pêşî di bin tesîra Şivan Perwer de mabûm. Piştre di bin tesîra kom û hunermendên wekî Koma Berxwedan, Huseynê Farê, Mihemed Şêxo, Ciwan Haco, Nîzamettîn Ariç û Xêro Abbas mam.

Askeri: Ez jî cara yekemîn di bin tesîra Şivan Perwer de mam. Piştre di bin tesîra kom û hunermendên wekî Koma Amed, Aramê Tîgran, Mihemed Arifê Cizrawî, Seîd Yûsif û Ahmet Kaya de mam.


We qet di çalakiyan de cih girtiye?

Me di gelek çalakiyên cur bi cur de cih girt. Em ji bo piştgiriyê di şevên partiyên kurdî de derketin ser dikê. Em gelek caran beşdarî bernameyên televîzyon û radyoyên herêmê bûn. Par jî ji bo ku em koma xwe bi temaşevanan binasînin di Roj Tv’yê de li bernameyekê bûn mêvan.

Hûn dikarin hinekî behsa albûma xwe bikin? We albûmê li ku û kengî çêkir?

Me bawer dikir ku em ji hêla xebatên xwe ve gihîştine merhaleyekê û êdî pêwîst bû me ji bo albûmekê gavek biavêta. Em li hev civiyan û me biryara çêkirina albûmê girt. Me di dawiya sala 2004’an de ji bo repertuarê bi Mustafa Gazî re şeş hefteyan xebitîn û di encamê de repertuara me temam bû û di heman demê de em ketin studyoyê. Mustafa Gazî hem ji her alî de alîkariya me kir û hem jî derhêneriya albûmê kir. Di dawiya 2005’an de albûma me xelas bû û di sala 2006’an de jî derket pêşberî muzîkhezan.


Di albûma we de çend stran hene?

Di albûmê de duwanzdeh stran hene. Ji wan şeş heb ên Mustafa Gazî ne. Xeynî wan stranan pênc stranên gelêrî jî Mustafa Gazî da me. Gotinên strana Yarê gotinên Hecî ne.


Muzîkhez eleqeyeke çawa nîşanî albûma we didin?

Muzîkhez eleqeyeke pir mezin nîşanî me didin. Em li her derê rastî hestên gel ên dilînî tên. Sektora muzîkê di rewşeke pir xirab de ye lê belê li hemberî vê rewşê albûma me gelek baş tê firotin.


Klîbên we hene?

Erê, du klîbên me hene. Me ji stranên “Hemo” û “Şervan bûm” re kişand.


Di warê muzîkê de cihê ku hûn dixwazin bigihîjinê ku der e?

Em kurd bi her awayî ji mafên xwe bêpar mane. Ji ber vê yekê em li gorî şertên heyî tevdigerin û di encamê de xebatên me li gorî van şertan pêk tên. Me divê em bi hunera xwe di riya têkoşîna neteweyî de pêşde biçin. Em bi her awayî di xizmeta gelê xwe de ne. Di warê muzîkê de hinek be jî feydeya me bigihîje têkoşîna neteweyî em ê şad û bextewar bin.


Ji bo albûma duyemîn tu xebatên we hene?


Erê. Muzîkhezan albûma me ya yekemîn pir eciband. Xebata me ji hêla gel ve pir hate hezkirin. Em bi vê hezkirina hanê motîve bûn û ev rewş ji bo çêkirina albûma duyemîn bû sedemeke girîng. Niha em di merhaleya repertuarê de ne. Piştî ku repertuar temam bibe em ê bikevin studyoyê. Em ê di albûma duyemîn de bi zaravaya zazakî jî çend stranan bixwînin. Lewre di albûma yekemîn de me bi zaravaya zazakî qet stran nexwend û ji ber vê yekê her kesî rexneyan li me girt; ku rexneyên li me hatibûn girtin tevde li cih bûn.  (ANF)
 

REKLAM

REKLAM

kurdish hip hop kürtçe hip hop kürtçe rap mûzika kurdî kurdish music ziman zimanê kurdi kurdish language hiphopa kurdi kurdce rap kurdish rap serhado xewna ji