ALBÛM-HEVPEYVIN                                                                   ‘Muzîk zimanê bêziman e’

Hevpeyvîn:DENİZ BİLGİN

Lorîn Berzincî, keçeke kurd e di albûma wê ya bi navê “Çîrokên Evînê” de, stranên evînî hene. Ew di muzîka xwe de dixwaze stîleke taybetî çêbike. Berzincî ji bo stîla xwe wiha dibêje: “Min dixwest stîleke taybetî çêbikim, stîleke girêdayî Lorîn. Ez bi zimanê keçên kurd stranan dinîvîsim û ez dixwazim bi zimanê keçên kurd û muzîka xwe jî pêş ve bibim.”

Jiyana te ya muzîkê kengî dest pê kir?

Jiyana min a muzîkê ji emrekî gelekî biçûk de dest pê kir, dora 5 salî bûm gava min stran li malê û li kolanê Qamişlo digotin, bi tenê û bi hevalên xwe re jî. Di malbata me de muzîk cihekî mezin standibû, xwişk û birayên min ên ji min mezintir, kêfa wan ji muzîkê re gelekî dihat û ez bawer dikim ev yek tesîra xwe li min kir. Muzîk û huner bo min ew germbûna ku jê mehrûm bûme gelek salan di welatê Swêd de, germbûnek ku di zaroktiyê de li Qamişlo pêkhat û ji ber vê yekê jî min girêdide bi wê demê ve. Mûzîk bi rastî zimanek taybetî ye, di baweriya min de. Muzîk zimanê kesên bê ziman û gotin in.

Te albûma xwe ya yekemîn derxist...

Çîrokên Evînê, albûma min ya yekem e. Karê gelek salan e û ez gelekî li hêviya vê rojê ma me, ji ber min dixwest formê wê û dabeşkirina muzîkê bi dilê min be û ne mîna bêhtirînê muzîka îro be. Min dixwest stîleke taybetî çêbikim, stîleke girêdayî Lorîn. Ev hemû kara min di ber xwendina xwe ya universitê de kir, hêdî hêdî û bi dilê xwe, ji ber vê yekê wext stand.

Bawer im tu stranan jî dinivisî?

Bêhtirînê gotinan ez bi xwe dinivîsînim, lê çêdibe carna ez gotinên xweş bibihîzîm û dil dikevim wan, gotinên ku li gora min bin û ez xwe di wan de bîbînim, mîna Lorîn wek mirov û beriya her tiştî mîna keç.

Tiştê ku hişt ez dest pê bikim bi nivîsandina helsbestên xwe ew bû ku bêhtirînê stranên kurdî, mixabin, ser keçan e û bi zimanê zilaman tên nivîsandin. Ez bi zimanê keçên kurd stranan dinivîsim. Ez îro kêfxweş im ku min di temenê 14 salî de, dest bi nivîsandinê kir û çêkirina awazan jî , stranên min hestên min baştir diyar dikin û ez keçek tijî hest im.

Di albûma te ya yekemîn de zêdetir stranên evînê hene, çima?

Evîn, evîn û tenê evîn... Bi hemû awa yan jî formên evînê. Çi evîna welat be, evîna yar be, evîna dê û bavan be. Ev mijara stranên min e ta vî temenî, îca nizanim bê wê di pêştir de çawa be? Nivîsandina stranan û mijarên wan girêdayî hestên mirov e. Bo min wisa ye. Hestên mirov jî tên guhertin bi dem, cî û temen re. Her beşek jiyana mirov û guhertinên wê hene. Lê her dîsan jî bawer dikim mijara evînê wê her dem , cîhekî wê yê taybetî hebe di hestên min de û hunera min de.

Daxwaza te ji bo paşerojê çi ye?

Ez ji dil hêvîdar im ku muzîka min û hunerê min bi dilê guhdaran be û hema piçek muzîka kurdî ya fireh, dewlementir bike, Ji ber ev stîla min ya têkel, nasnameya gelek ciwanên ku li dûrî Kurdistanê mezinbûn e. Û ez dixwazim berdewam bim di vê şopa xwe de û gelek gelek stranên din çêbikim, bi zimanê keçên kurd û muzîka xwe jî pêş ve bibim.

Tu him dixwinî him jî xebatên muzîkê çedikî? Ne zor e?

Bêguman, ne hesan e, lê kesê daxwaza wî bi qewet be kare sebrê jî bikişîne. Xwêndina zanîngehê pir giran e û xwendina min jî ne li Stockholmê ye, li bajarekî din e. Ez rojane diçim û têm û karê muzîka jî di ber re dikim. Ji bilî vê qasî jî, ez kar jî dikim, bo ku mesrefa cd ya xwe bi xwe bidim. Ji ber vê yekê jî demek dirêj stand, ta min albûma xwe derxist. Lê xem nake, niha mirov hîna xort e û ciwan e ta niha karim, xwendin jî gelek nema ye. Ev sala dawî ye. Ez mîna werger jî kar dikim, zimanê kurdî, erebî û swêdî û li radiyo ya Swêdê jî kar dikim, di beşê kurdî û erebî de. Programan çêdikim.

Ji bo paşerojê projeyên te çi ne?

Ez herdem berdewam dikim di karê muzîkê de, em niha klîpeke nû amade dikin, wê demekî nêzîk de bên weşandin û di biharê û havînê de jî bi nêtim konerta çêbikim li deverên Kurdistanê. Ji bilî karê muzîkê di paşerojê de, dixwazim kar bikim di rêxistinên navneteweyî de bo mafên mirovan. Kesên ku dixwazin, albûma min di malpera min www.lorinmusic.com de bibîne.


Lorîn Berzincî kî ye?

Lorîn Berzincî di sala 1980 ê li bajarê Qamişloyê ji dayik bû, di malbateke mezin de mezin bû. Di temenê xwe ya 10 saliyê de bi malbata xwe re mal bar kir Europayê û li welatê Swêdê bi cih bû. Berzincî di pênc saliyê xwe de dest bi strangotinê û fêrbûna gotinên stranan kir. 14 saliya xwe de dest bi nîvîsandina stranan û çêkirina awazan kir. Berzincî, beşdarî gelek komên muzîkê bûye. Piştra biryara xwe daye ku ew muzîka xwe ya taybetî çê bike. Albûma wê ya yekemîn îsal derket

Berzincî, ji aliyek de xwendina bilind (universîtê) li Fakulta Zanistiya Rojhilata Navîn bi zanistiya ramyarî û zimanê Rojhilata Navîn re, wek kurdî (soranî, kurmancî), farisî û erebî dixwîne. Ji bilî xwendina universîtêyê muzîk û teknîka strangotinê xwendiye.

REKLAM

REKLAM

kurdish hip hop kürtçe hip hop kürtçe rap mûzika kurdî kurdish music ziman zimanê kurdi kurdish language hiphopa kurdi kurdce rap kurdish rap serhado xewna ji