KONFERANS                                                                                                         Konferansa Muzîka Kurdî bi dawî bû

AMED- Li Amedê, yekemîn Konferansa Muzika Kurdî hat lidarxistin. Konferansa ku ji aliyê Navenda Çanda Mezopotamyayê ve û bi piştgiriya Şaredariya Amedê hatiye amadekirin, du roj dom kir.

Li Amedê Yekemîn Konferansa Muzika Kurdî, di 23ê Çileyê pêşîn de li Salona Şaredariya Rezan ya Amedê bi beşdariya hêjmarek mezin ya rewşenbîr, hunermend û muzîsiyenên Kurd yên wek Dilşad Saîd, Seîd Yusuv, Tara Caf, Nîlufer Akbal, Metîn Kemal Kahraman, hunermendên Komên Musîkê yên wek Koma Azad, Koma Asmîn Serokê Şaredariya Mezin ya Amedê Osman Baydemîr û Serokên Şaredariyên din yên Amedê, nûner û Serokên partiyên Siyasî yên Kurdan, hat lidarxistin

Konferansa Muzika Kurdî ya bi navê “ ji paşerojê heta îro û ji îro ber bi pêşerojê ve” bi deqîqek rêzgirtin ji giyanê pakê şehîdên Kurd re û bi axaftina berdevkê Navenda Çanda Mezopotanyayê Hasan Şeker destpêkir.

Hesen Şeker di axaftina xwe de bal kişand ser giringîya vê konferansê û weha got: “ Em vê hevdîtinê gelek girîng dibînin. Ji ber ku Kurdên ku sînorên wan bûne çar perçe, lê dilê wan hêj yek e, li vir li hev civîyane. Nirxê me yê çandî sînoran nas nake û em li ser vê esasê dibine yek, ev jî hêviyên me yên pêşerojê xurtir dike.”

Yek ji wan kemençêrê navdar yê Kurd Dilşad Seîd li ser girîngî û rewşa mûzika Kurdî weha got; “ji bo berhevanîna muzika herçar perçeyên Kurdistanê, konferansên bivî rengî gellek girîng in.”

Dilşad, bal kişand li ser girîngiya ziman ya li ser pêşkeftina mûzîkê weha got; “tesîra ziman ya li ser pêşkeftina mûzîkek gellek girîng e. Ger em bi zimanê xwe neaxifin û zimanê xwe di jiyanê de bi kar neynin em Kurd nîn in.

Serokê Şaredariya Mezina ya Amedê Osman Baydemîr jî balkişand li ser awaz û stîla muzika kurdî û xwest ku di qada navnetewî de ev awaz bên nasandin.

Konferansa Muzîka Kurdî, di roja duduyan de jî bi pêşkêşkirina hin babetên li ser rewşa muzîka Kurdî dom kir. Di konferansê de hunermend, muzîsyen û lêkolînerên wek Mihemed Bayrak, Dilşad Seîd, Tara Jaff, Vedat Yildirim, Nilufer Akbal, Mihemed Atli, Kakşar Oramar û hwd. li ser babetên curbecur yên muzîka Kurdî, gotarê xwe pêşkêşkirin.

“Divê hunermendê Kurd nekevin kemînên termolojiya dagirkeran”

Nivîskar û lêkolîner Mihemed Bayrak, li ser girîngiya termolojiya muzîka Kurdî rawestiya. Mihemed Bayrak diyar kir ku termolojiya muzîka Kurdî, taybetmendiya wê heye, divê hunermendê Kurd nekevin kemînên termolojiya dagirkeran.

Encamnameya Konferansa Muzîka Kurdî

Konferansa Muzîka Kurdî, ji raya giştî re encamnameyek belav kir. Di encamnameyê de, ji Wezareta Çandî ya Tirkiyê hat xwestin ku asteng û çeperên pêşiya muzîka Kurdî, bên rakirin.

Di encamnameya Konferansa Muzîka Kurdî de hinek ji biryarên ku li Konferansê hatine wergirtin, weha ne;

Di vê Konferansê de carek din piştrast bû ku Kurdistan, di warê pirrçandî, pirrolî û hunerê de coxrafiyek dewlemend e. Ji ber vê yekê, divê tevê van nirxan bên parastin û li ser wan lêkolîn bê kirin.

Divê bi xebatên akademîk û zanyarî giranî li ser muzîka Kurdî bê danîn û bi zanyaran re pêvendî bê danîn daku muzîka Kurdî bigrin rojeva xwe û piştgiriyê bidin pê.

Muzîsiyen û lêkolînerên ku li ser muzîka Kudî dixebitin, bên birêkxistin û bi berfirehî bixebitin.

Bi piştgiriya sazî û muzîsiyenên Kurd, di derbarê muzîka Kudî de proje bên amadekirin û pêşkêşê saziyên navneteweyî yên wek UNESCO, Netewên Yekbûyî, Yekîtiya Ewrûpayê û hwd. bê kirin.

Ji bo amadekirina arşîv û berhevkirina nirxên muzîka Kudî, li her cîhên ku Kurd lê dijîn, grûbên xebatê bên avakirin û bi xebatek hevbeş, saziyên di vî berbarî de bên çêkirin.

Ji bo ev belavbûn û perçebûna navbera muzîsiyenên Kurd ji holê rabe, divê Yekîtiya Muzîsiyenên Kurd bê avakirin û her muzîsiyenên beşdarê vê Konferansê bibin endamê xwezayî yê Yekîtiya Muzîsiyenên Kurd.

Ji bo avakirina Konserwatuwarên Kurdî, hewldanên pêwist bên kirin.

Hunermendên Kurd bi şahîyek ligel hev civiyan

Li Amedê, hunermend, muzîsîyen û nivîskarên kurd ku beşdarê konferansa Muzika kurdî bûbûn, bi vê mebestê bi şahiyek ligel hev kom bûn. Şahiya ku li Otêla Dedemanê pêkhat, bi coş derbas bû.

Şahiya ku bi hevkariya Şaredariyê Amedê ku ji aliyê Navenda Çanda Mezopotamyayê ve hatibû amadekirin, ligel Serokê Şaredariya Mezin ya Amedê, Serokê şaredariyên din yên Amedê, hêjmareke mezin hunermend, muzîsîyen û nivîskarên wek Mihemed Bayrak, Dilşad Seîd, Tara Caf, Nilufer Akbal, Metîn Kemal Kahraman, Seîd Yusûf û Aynûr Dogan beşdar bûn.

Serdestîya Tirkî di konferansê de bû sedema nerazîbûnan

Di Konferansa Muzîka Kurdî de, ji bilî kesên ku bi tirkî nizanin an jî bi tenê kurdî dizanin hemû delegeyên ku nirxandin kirin, bi tirkî axivîn.

Di Konferansa Mûzîka Kurdî ku bi feraseta 'divê muzîka kurdî jî li ser xaka kurdan bê nîqaşkirin' cara yekem li Amedê tê lidarxistin de, ji bilî kesên ku bi tirkî nizanin hemû delege bi tirkî axivîn. Vê yekê jî di hişê mirovan de xalepirsên wekî, 'Gelo muzîka kurdî bi zimanekî din dikare bi hemû aliyan ve bê nîqaşkirin û pêşve birin? Kesên ku nikarin xwe bi kurdî îfade bikin dê muzîka kurdî çawa pêşve bibin?, Bi vî rengî dê kurdî nekeve bin tesîra tirkî?' di hêşin mirovan de derxistin.

 

Girêdanên Derve -     

REKLAM

REKLAM